Atish

yih arzu thi tujhe gul ke rubaru karte
ham aur bulbul-e betab guftagu karte.

payambar na muyassar hua to khub hua
zaban-e ghair se kya sharh-e arzu karte.

meri tarah se mah-o mihr bhi hain avara
kisi habib ki yih bhi hain justaju karte.

jo dekhte tere zanjir-e zulf ka alam
asir hone ki azad arzu karte.

na puch alam-e bargashta-tali’i Atish
barasti ag jo baran ki arzu karte.

My desire was to set you opposite the rose
so I might discuss you with the pining nightingale.

It was good that no messenger was available:
how could another’s tongue have set out my desire?

Like me, the sun and moon are wandering:
they too are searching for someone that they love.

Those who see what the chain of your long hair is like
freely desire their own imprisonment.

Do not ask about my ill-starred condition, Atish:
it is a raining fire which desires the rain.

Zauq

Kisi Be-Kas Ko Aai Bedaad-Gar Maara To Kya Maara
Jo Aap Hi Mar Raha Ho Us Ko Gar Maara To Kya Maara

Na Maara Aap Ko, Jo Khaak Ho Akseer Ban Jaata
Agar Paare Ko Aai Askeer Gar Maara To Kya Maara

Hansi Ke Saath Yaan Rona Hai Misl-E-Qulqul-E-Meena
Kisi Ne Qehqaha Ai Be-Khabar Maara To Kya Maara

Gaya Shaitaan Maara Eik Sajde Ke Na Karne Mein
Agar Lakhon Baras Sajde Mein Sar Maara To Kya Maara

Bare Moozi Ko Maara, Nafs-E-Ammaara Ko Gar Maara
Nahang-O-Azhdaha-O-Sher-E-Nar Maara To Kya Maara

Dil-E-Sangeen-E-Khushru Par Bhi Zarb-E-Kohkan Pahunchi
Agar Tesha Sar-E-Kohsaar Par Maara To Kya Maara

Dil-E-Bad-Khwaah Mein Tha Maarna Ya Chashm-E-Bad-Been Mein
Falak Par Zauq, Teer-E-Aah Gar Maara To Kya Maara !

asghar gondvi

Asraar-E-Ishq Hai Dil-E-Muztar Liye Huwe
Qatra Hai Beqaraar Samandar Liye Huwe

Kya Mastiyaan Chaman Main Hain Josh-E-Bahaar Se
Har Shaakh-E-Gul Hai Haath Mein Saaghar Liye Huwe

Pehli Nazar Bhi Aap Ki Uf Kis Balaa Ki Thhi
Hum Aaj Tak Woh Chot Hain Dil Par Liye Huwe

Tasveer Hai Khinchi Hui Naaz-O-Niyaaz Ki
Main Sar Jhukaaye Aur Woh Khanjar Liye Huwe

Main Kya Kahun, Kahaan Hai Muhabbat, Kahaan Nahin
Rag Rag Mein Daudi Phirti Hai Nashtar Liye Huwe

Asghar Hareem-E-Ishq Mein Hasti Hi Jurm Hai
Rakhna Kabhi Na Paaon Yahaan Sar Liye Huwe

miscellaneous

Hai kahan tamanna ka doosra qadam Yarab
Hum Nai dasht-e-imkaan ko ek naqsh-e-paa paya - ghalib

Aina kyun na dun k tamasha kahen jise
aisa kahan se laun k tujhsa kahen jise

"ghalib" bura na man jo waiz bura kahe
aisa bhi koi hai k sab acha kahen jise

surme ka khaal mushafe ariz pe kis liye
nuqta barha rahe ho khuda ki kitaab main - qamar jalalvi

ishq insaan ko diwana bana deta hai
apne mahol se begana bana deta hai
husn anware ilahi ka majazi paikar
jaam kausar ka nazron se pila deta hai - marghoob

hamne ajab majra dekha
chote logon ka dil bara dekha
dast-e qatil ki sangdili dekhi
marne walon ka hausla dekha - marghoob